Plantun de Prouvènço

Pèr coumpara dos planto d'encò nostre

Carex remota & Pinus cembra

Queirello(-à-espigueto-escartado)

Carex remota

Cyperaceae

Àutri noum : Moutouso, Sagneto.

Nom en français : Laîche à épis espacés.

Descripcioun :
Aquesto queirello trachis dins li bos umide e en ribo d'aigo pulèu sus sòu séusous. I'a pas trop pèr s'engana que se recounèis pulèu eisadamen emé sis pichòtis espigueto de 4 à 8 mm escartado (de 5 à 20 cm) long de la cambo. Lis utriculo de 2,5 à 3,5 mm soun d'un verd jaunas.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 60 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 4 à 8 mm
Flourido : Printèms - Estiéu

Sòu : Si (Ca)
Autour basso e auto : 0 à 1300 m
Aparado : Noun
Mai à juliet

Liò : Ribiero - Bos umide - Lauroun
Estànci : Termoumediterran à Mountagnard
Couroulougi : Éuropo-Caucasiano
Ref. sc. : Carex remota L., 1755

Èlevou

Pinus cembra

Pinaceae

Àutri noum : Èlvou, Èlve, Éuve, Alvié, Auvié.

Noms en français : Pin cembro, Arole.

Descripcioun :
L'èlevou (e si varianto dins la Tinèo) que ié dison peréu l'éuve en Ubaio, es un aubre de mountagno pas proun grand. Se recounèis à sis aguio groupado pèr 5 e à si pigno que caupon de grano manjadisso.

Usanço :
L'èlve fai de pignoun que soun manjadis. Soun bos èi recerca pèr l'esculturo e li moble. "Se fahiò de caissos en èlve". L'èlve, as mancou besougn de lou tratar perqué a uno resino que las bèstios l'atacon pas (J.-L. Domenge in LMT, op.cit. p. 52). Es proun esta utilisa pèr lou rebouscage. L'òli essenciau èi vertuous contro lou tussi.